ಹವಿಂಗ್ಲಿಷ್

ಜಯಲಕ್ಷ್ಮೀ, ನಿಜಕ್ಕೂ ಹೆಸರಿಗೆ ತಕ್ಕಂತೆ ಇದ್ದ ಹುಡುಗಿ. ಕಾರೆಕೊಪ್ಪದ ಶ್ಯಾಮ ಭಟ್ಟ ಮತ್ತು ಸುನಿತಾ ಅವರ ಹಿರಿಯ ಸಂತಾನ. ಹಿರಿಯ ಸಂತಾನ ಅಂತಲೋ ಅಥವಾ ಪರಧನ ಎಂದೋ ಗೊತ್ತಿಲ್ಲ. ಅವಳನ್ನು ತುಸು ಅತಿಯಾದ ಮುದ್ದಿನಿಂದ್ಲೇ ಬೆಳೆಸಿದ್ದು ಅವಳ ದೇಹವನ್ನು ಕೋಮಲವಾಗಿಸಿ ಮನಸ್ಸನ್ನು ಸೂಕ್ಷ್ಮವಾಗಿಸಿ ಗೆಳತಿಯರೆಲ್ಲಾ ಅವಳನ್ನು ಜ್ವರಲಕ್ಷ್ಮಿ ಎಂದು ಹಿಂದಿನಿಂದ ಕರೆಯುವಂತೆ ಮಾಡಿತ್ತು.

ಹೀಗಿದ್ದ ಜಯಲಕ್ಷ್ಮಿ ಸುಖವಾಗಿ ಬದುಕುತ್ತಾ ಕಷ್ಟಪಟ್ಟು ಓದುತ್ತಾ ಎಲ್ಲೂ ಫೇಲಾಗದೆ ಡಿಗ್ರಿ ಮುಗಿಸಿದಳು. ಪ್ರಾಯ ಬಂದ ಮಗಳಿಗೆ ಮದುವೆ ಮಾಡಬೇಕಲ್ಲ. ಗಂಡು ಎಂಥದ್ದಾದರೂ ಆದೀತೆ? ಬೇರೆ ಅವರೆಲ್ಲಾ ಬೆಂಗಳೂರಲ್ಲಿದ್ದ ಹುಡುಗರಿಗೆ ಕೊಟ್ಟಾಗ ತಾನು ಮಗಳನ್ನು ಬೇರೆ ಅವರಿಗೆ ಕೊಟ್ಟರೆ ತನ್ನ ಬೆಲೆ ಏನಾದೀತು. ಸ್ಟಾಪ್ ವೇರ್ ಮಾಣಿಯೇ ಬೇಕು. ಅದಕ್ಕೆ ತಮಗೇನು ತಯಾರಿ ಬೇಕು ಎಂದು ಯೋಚಿಸುವಷ್ಟು ತಲೆ ಭಟ್ಟರಿಗಿಲ್ಲದಿದ್ದರೂ ಭಟ್ಟರ ಹೆಂಡತಿಗಿತ್ತು. ಹೋದಲ್ಲೆಲ್ಲಾ ಕಿವಿ ಉದ್ದ ಮಾಡಿ ತಿಳಿದಿದ್ದು ಏನೆಂದರೆ "ಬೆಂಗಳೂರಿನಲ್ಲಿ ಸ್ಟಾಪ್ ವೇರ್ ನಲ್ಲಿಪ್ಪವಕ್ಕೆ ಬೇರೆ ರಾಜ್ಯದವ್ವು ಎಲ್ಲಾ ಪರಿಚಯ ಇರ್ತ. ಅದಕ್ಕೆ ಇಂಗ್ಲೀಷ್ ಚೊಲೋ ಮಾತಾಡಕ್ಕೆ ಬರದೇ ಇದ್ರೆ ಗ್ರೇಡಿಗೆ ಕಮ್ಮಿ."

ಸುನಿತಾ ತಡ ಮಾಡಲೇ ಇಲ್ಲ. ಮಗಳನ್ನು ಸಿರಸಿಯಲ್ಲೇ ಇಂಗ್ಲಿಷ್ ಸ್ಪೀಕಿಂಗ್ ಕೋರ್ಸ್ ಗೆ ಸೇರಿಸಿ ಇಂಗ್ಲೀಷ್ ಕಲಿಸಿಯೇ ಬಿಟ್ಟಳು. ಮಹಾದೇವನೂ ಕಣ್ಣು ಬಿಟ್ಟ. ಸ್ಟಾಪ್ ವೇರ್ ಅಳಿಯನೇ ಸಿಕ್ಕಿದ. ಆತನ ಟೀಂ ನಲ್ಲಿದ್ದವರೆಲ್ಲಾ ಕನ್ನಡಿಗರೇ ಆಗಿದ್ದರಿಂದ ಪಾಪ ಜಯಲಕ್ಷ್ಮಿಗೆ ಇಂಗ್ಲಿಷ್ ಮಾತಾದುವ ಅವಕಾಶವೇ ಬರಲಿಲ್ಲ. ವರ್ಷ ಒಪ್ಪತ್ತು ಅನ್ನುವಷ್ಟರಲ್ಲಿ ಜಯಲಕ್ಷ್ಮೀ ಸುಂದರ ಗಂಡು ಮಗುವಿನ ತಾಯಿಯಾದಳು. ಮಗು ಹುಟ್ಟಿದ ಘಳಿಗೆಯೋ ಎಂಬಂತೆ ಗಂಡನಿಗೆ ಇಂಗ್ಲೆಂಡಿಗೆ ಆನ್ ಸೈಟ್ ಆಪರ್ಚುನಿಟಿ ಸಿಕ್ಕಿತು. ಸುನಿತಾ ಊರಲ್ಲಿದ್ದ ದೇವಸ್ಥಾನಕ್ಕೆಲ್ಲಾ ಹೋಗಿ, ದೇವರಿಗೆ ಕಾಯಿ ಒಡೆಸಲೋ ಎಂಬಂತೆ, ಊರವರ ಮುಂದೆಲ್ಲಾ "ಅಳಿಯ ಮಗಳು ಫಾರಿನ್ನಿಗೆ ಹೋಪವ್ವಿದ್ದ, ಗೊತ್ತಾಜೋ ನಿಂಗೆ?" ಎಂದು ಟಾಮ್ ಟಾಮ್ ಹೊಡೆದು ತನ್ನ ಬಾಯಿ ತುರಿಕೆ ಕಮ್ಮಿ ಮಾಡಿಕೊಂಡು ಅಹಂಕಾರ ತೃಪ್ತಿ ಪಡಿಸಿಕೊಂಡಳು.

ಇಂಗ್ಲೆಂಡಿಗೆ ಹೋಗಿ ಸ್ವಲ್ಪ ದಿನ ಮಾತ್ರ ಕಳೆದಿತ್ತು. ಮಗು ಒಂದೇ ಸಮನೆ ಅಳತೊಡಗಿತ್ತು. ಡಾಕ್ಟರ್ ಹತ್ತಿರ ಕರೆದುಕೊಂಡು ಹೋದರು. ಡಾಕ್ಟರ್, "Yeah tell me What’s the problem" ಎಂದು ಕೇಳಿದಾಗ ಗಂಡ ಏನಾದರೂ ಹೇಳುವ ಮೊದಲೇ ಜಯಲಕ್ಷ್ಮಿ ಬಾಯ್ ಹಾಕಿ, " One hour lost. Nothing eatta nothing drinkta. Gametnoo ille ವೀಪದೊಂದೇ ಆಜು." ( ಒನ್ ಅವರ್ ಲಾಸ್ಟ್. ನಥಿಂಗ್ ಈಟ್ತ ನಥಿಂಗ್ ಡ್ರಿಂಕ್ತ. ಗೇಮ್ತ್ನೂ ಇಲ್ಲೆ. ವೀಪದೊಂದೇ ಆಜು)ಎನ್ನಬೇಕೆ? ಅವಳು ಹೇಳ ಹೊರಟಿದ್ದೇನೆಂದರೆ, "ವಾಂದು ತಾಸ್ ಕಳತ್ತು. ಎಂತೂ ತಿ೦ದಿದಿನಿಲ್ಲೆ ಎಂತೂ ಕುಡದ್ದ್ನಿಲ್ಲೆ. ಆಡಿದ್ನೂ ಇಲ್ಲೆ. ಬರೇ ಅಳದು"